haec quoque est lex hostiae pro delicto sancta sanctorum est
idcirco ubi immolatur holocaustum mactabitur et victima pro
delicto sanguis eius per gyrum fundetur altaris
offerent ex ea caudam et adipem qui operit vitalia
duos renunculos et pinguedinem quae iuxta ilia est
reticulumque iecoris cum renunculis
et adolebit ea sacerdos super altare incensum est Domini pro
delicto
omnis masculus de sacerdotali genere in loco sancto vescetur
his carnibus quia sanctum sanctorum est
sicut pro peccato offertur hostia ita et pro delicto
utriusque hostiae lex una erit ad sacerdotem qui eam obtulerit
pertinebit
sacerdos qui offert holocausti victimam habebit pellem eius
et omne sacrificium similae quod coquitur in clibano et
quicquid in craticula vel in sartagine praeparatur eius erit
sacerdotis a quo offertur
sive oleo conspersa sive arida fuerit cunctis filiis Aaron
aequa mensura per singulos dividetur
haec est lex hostiae pacificorum quae offertur Domino
si pro gratiarum actione fuerit oblatio offerent panes
absque fermento conspersos oleo et lagana azyma uncta oleo
coctamque similam et collyridas olei admixtione conspersas
panes quoque fermentatos cum hostia gratiarum quae
immolatur pro pacificis
ex quibus unus pro primitiis offeretur Domino et erit
sacerdotis qui fundet hostiae sanguinem
cuius carnes eadem comedentur die nec remanebit ex eis
quicquam usque mane
si voto vel sponte quisquam obtulerit hostiam eadem
similiter edetur die sed et si quid in crastinum remanserit
vesci licitum est
quicquid autem tertius invenerit dies ignis absumet
si quis de carnibus victimae pacificorum die tertio
comederit irrita fiet oblatio nec proderit offerenti quin
potius quaecumque anima tali se edulio contaminarit
praevaricationis rea erit
caro quae aliquid tetigerit inmundum non comedetur sed
conburetur igni qui fuerit mundus vescetur ea
anima polluta quae ederit de carnibus hostiae pacificorum
quae oblata est Domino peribit de populis suis
et quae tetigerit inmunditiam hominis vel iumenti sive
omnis rei quae polluere potest et comederit de huiuscemodi
carnibus interibit de populis suis
locutusque est Dominus ad Mosen dicens
loquere filiis Israhel adipem bovis et ovis et caprae non
comedetis
adipem cadaveris morticini et eius animalis quod a bestia
captum est habebitis in usus varios
si quis adipem qui offerri debet in incensum Domini
comederit peribit de populo suo
sanguinem quoque omnis animalis non sumetis in cibo tam de
avibus quam de pecoribus
omnis anima quae ederit sanguinem peribit de populis suis
locutus est Dominus ad Mosen dicens
loquere filiis Israhel qui offert victimam pacificorum
Domino offerat simul et sacrificium id est libamenta eius
tenebit manibus adipem hostiae et pectusculum cumque ambo
oblata Domino consecrarit tradet sacerdoti
qui adolebit adipem super altare pectusculum autem erit
Aaron et filiorum eius
armus quoque dexter de pacificorum hostiis cedet in
primitias sacerdotis
qui obtulerit sanguinem et adipem filiorum Aaron ipse
habebit et armum dextrum in portione sua
pectusculum enim elationis et armum separationis tuli a
filiis Israhel de hostiis eorum pacificis et dedi Aaron
sacerdoti ac filiis eius lege perpetua ab omni populo Israhel
haec est unctio Aaron et filiorum eius in caerimoniis
Domini die qua obtulit eos Moses ut sacerdotio fungerentur
et quae praecepit dari eis Dominus a filiis Israhel
religione perpetua in generationibus suis
ista est lex holocausti et sacrificii pro peccato atque
delicto et pro consecratione et pacificorum victimis
quas constituit Dominus Mosi in monte Sinai quando mandavit
filiis Israhel ut offerrent oblationes suas Domino in deserto
Sinai
